×

Usamos cookies propios e de terceiros para mellorar os nosos servizos. Se continúa a navegar, consideramos que aceptar o seu uso. Pode obter máis información aquí.

Loading
Clusaga participa nos dous primeiros Hubs de Innovación Dixital de Galicia

A Xunta de Galicia aprobou a creación dos dous primeiros Hubs de Innovación Dixital de Galicia cuxos obxectivos son achegar ás pemes as tecnoloxías asociadas á fábrica do futuro, como o internet das cousas ou a intelixencia artificial, e ao manexo de grandes cantidades de información (big data) vinculadas ao desenvolvemento das ciencias da vida.

O Clúster Alimentario de Galicia (Clusaga) participará nos dous Hubs de Innovación Dixital de Galicia, que estarán liderados polo Clúster de Empresas de Automoción de Galicia (Ceaga) e o Clúster Tecnolóxico Empresarial das Ciencias da Vida (Bioga). A Xunta prevé que ambos estean plenamente operativos a partir do ano 2020 e cumpran co obxectivo de estender o impacto positivo da innovación nas pequenas e medianas empresas galegas.

Hubs de Innovación Dixital de Galicia

Os Hubs de Innovación Dixital funcionan como unha venda única de capacidades tecnolóxicas na que conflúen todos os recursos que os centros de coñecemento galegos ofertan ás pemes, achegando tamén apoio integral para levar os produtos e servizos innovadores ao mercado.

O Hub de Innovación Dixital impulsado por Ceaga e coliderado por Clusaga, beneficiará aos sectores automoción, agroalimentario, naval, forestal e téxtil; mentres que o de Bioga prevé ofrecer servizos ás cadeas de valor da biotecnoloxía, saúde, forestal, agroalimentario e mar-industria.

Ademais da participación de Clusaga, ambos os hubs contarán co apoio doutros clústeres, centros tecnolóxicos, grandes empresas tractoras, compañías tecnolóxicas e universidades. O seu funcionamento virá determinado pola demanda das empresas e deberán autogestionarse de forma independente e tender cara á sustentabilidade económica, a través do cobro dos servizos prestados aos usuarios e doutras achegas privadas.